LYRIC
(*_*) =*=*=*=*=*= (*_*)
Christian Pilna
Thuciam Lui
Hi thukham theampo note hong hil tu in Topa na Pathian in keima thu hong pia hi. Na lua natu ngamsung na tum uh ciang hi thupiakte zui vun.
Tuni a kong piak hi thupiakte mangil ngei heak vun. Tua thupiakte na tate hil vun. Inn ah ahizong, lampi ah ahizong, na tawlngak ciang le na nasep ciang ahizong hil kik tawntung vun.
Hong phawk sak kik tu in na baan ah khi in, na talki ah bel vun. Na kongbiang tung le na bang tungah at vun.
Kong hilnate a tawntung keamcing in a; na lungtang tungah at in. Ciimna sia na suapui nu bangin ngaisun in a, a thuk muna sia na ngualtam phabel bangin ngaisun in.
Mihing a ciimte in khiakna nei in pau a, ahizong a mamawte daan piak pha hi. A ciimte in heakna a nga thei za in la a, ahizong mihing mamawte hong pau ciang buaina taw kinai hi.
Heakna nanei natu in Topa zatakna na neiphot kul hi. Mihing mamawte in ciimna awlmawk ngawlin sin nuam ngawl hi.
Na pa le na nu hong sonte pha takin nadon in, ka ta pa awng. A mate hong hilnate in a et hoi dial khawng, khi khawng ii na meal hong hoituam sak bangin na ngamtat zia hong pua sak tu hi.
Pathian in mite munah, “ Na ciim natu uh in, Topa zakta tu nu hi. Na heak natu in siatna pial tu nu hi,” ci hi.
Khangno khat in ama nuntakna bangbangin a thiangtho in keam cing thei tu ziam?
Na thupiakte nitna taw keamcing thei tu hi. Nang tungah kong khial ngawl natu in na thukhamte ka thin sungah ka keam hi.
Tu in, athi thei mihing awng, nang Israel ngam ii ngalvilpa in kong koi hi. Nang tungah kidopna tu thu kong piak papo amate zasak sawn tu ni hi.
Mihing ngilo khat a thi tu in ka tangko a, ahizong a ngamtatna kikheal in a thi natu pan suatak natu in na son bua ahile, amasia mimawpi in a thi tu hi, ahihang ama thina sia nang tungah hong kisik tu hi.
Thuciam Thak
Suapuite awng, ka minamte ngupna a nga natu in ka thinsung theampo taw deisak in Pathian tungah thu ka nget sak hi!
Pathian mai ah mihingte thutang a kisuasak zia he ngawl a, lampi tuamdang khat saat uh hi. Tua ahikom amate in Pathian ih mihingte thutang a sua sakna sungah a ki aap bua uh hi. A umte theampo Pathian mai ah thutang a sua natu in Christ in thukham bo sak zo hi.
Suapuite awng, Pathian ii a thumaan thukuu hiltu in note kungah kong pai lai in kamthukte le pilna kamte kong zangh bua hi.
A up thei natu in Jewte in na lamdang lakna ngen uh a, Greekte in ciimna zong uh hi.
Jesus Christ thu, atuan in thinglamtee tungah hong thina ngawl po thudang ngaisut ngawl tu in ka khensat zo hi.
Lai Thiangtho in, “Mihing a ciimte ii ciimna ka lalsak tu a, mihing pilte ii pialna ka hep sak tu hi,” ci hi. Tua ahile mihing ciimte, mihing pilte le hi leitungah thu kinial a thiamte sia bangsuak tu ziam? Hi leitung ii ciimna sia mawmawtna hi ci in Pathian in lakzo hi!
Pathian in ama pilna hong zangh a, mihingte in amate pilna taw Pathian a heak zawk ngawl natu in vawt hi. “Mawmawt” thu hi a kici kote thuhilna taw, Pathian in a umte ngum tu in khensat zo hi.
Tua ahikom note upna in mihingte ciimna tungah kinga ngawlin Pathian vaangletna tungah kinga hi.
Ciimna na kisamh uh le, ama in a pia tu pa, Pathian tungah thu ngen tahen; bang hangziam cile Pathian in ngo tatak le thuthiam takin, a vekpi tungah pia hi.
Ih Topa Ngumpa Jesus Christ heakna sung le thuthiamna sungah na khangto suak vun. Ama tungah minthanna, tu le a tawntung in om tahen! Amen.
(*_*) =*=*=*=*=*= (*_*)
Comments are off this post