LYRIC
7 Minam Itna (Patriotism)
Thuciam Lui
Pathian awng, taangtawng ka pu ka pate hunlai in na sep na vawtte hong kison zo a, ka zazo uh hi.
Nangma mama in Pathian he ngawlte na notkeak a, amate ngam sungah na mite na koina thu minam dangte daan pia in na mite na khanto sakna thu ka za uh hi.
Na mite in amate thahatna namsau uh taw tua ngamte a zothal hi ngawl hi;
Nangma’ vaanglet thahatna taw zo uh hi, nangma ompuina taw a zo uh a, amate na itna na lakna ahi hi.
Tuute bangin nong ki ngolum sak a; ngamdang ah nong thethaang hi. Bangma manh a nei ngawlte bangin na mite nong zuak zo hi.
Nang hong mangil ngawlin, ko taw na vawt thuciamnate zongh paltan ngawl hi napi, hite theampo ko tung ah nong tung sak zo hi.
Nang tungah thumaan ngawlin om a, nong thupiakte kong nial bua uh hi.
Ka Pathian biakna nusia in, ngam dangte pathian tungah thungen hi le ung, hong mu tatak zo tu ni hi. Banghangziam cile ka thinsung tawng dongin na hesiat hi.
Ahihang nang hu in kote thalupna ka thuak tawntung uh a, ngawlup tu tuute bangin hong kivawt hi.
Lei ah pukin ka top zo uh a; leivui sungah lelna taw ka liik zo uh hi. Ko hong hu tu in hong pai tan! Tatsat ngawl nong itna hu in hong hun tan!
Thuciam Thak
Noma le noma kitheam heak vun; Pathian sia theam zawk hi ngawl hi. Mihing khat in a poai bang lian in at tu hi.
Ci le sa deina lo sungah a poai te in thina an aat tu hi; Thaa ii deina lo sungah a poaite in nuntak tawn tungna an a aat tu hi.
Tua ahikom na pha sepna sungah toih kisa ba tawng; thinkiam bapo leang ih anlaak tu hun hong theng tu hi.
Hunpha ih nga simin a pha ih seam tu a, a tuan in ih upna taw ih innkuan puite tung napha ih seam tu hi.
A khakbel in, Topa taw kikopna le ama vaangletna sung ah na thahat tavun.
Doaimangpa ii ngitlo theamnate na nalh zawk natu in, Pathian hong piak ngalvanhte na silh vun.
Tu in Pathian ngalvante silh vun! Hun ngilo ni hong thet ciangin ngalte na nalh zo tu uh hi; a tawp dong na sim zawk ciangin na dinmun kip lai tu hi.
Tua ahiciang, kawngkhau ngat bangin thutak zangh vun a, awmdal thua bangin thutang na zangh vun, kithoai a, peangdap thua bangin, Lungdamna Thupha a thang sak tu in, kinging vun. Na theampo sungah upna sia lumdal bangin pua vun; banghangziam cile tua taw Ngilopa hong kapna thaltang kuangte theampo na sukmit thei tu uh hi.
Ngupna sia thik lukhu bangin na khu vun a, taciang Thaa ii hong piak Pathian kammal sia namsau bangin na zangh vun.
Hite theampo thungetna taw seam vun a, Pathian tungah huuna na ngen vun. Thaa hong lampui bangin, na theampo sungah thu na ngen vun. Hi thu hu in ki pilvang sakin, na thin kiamsak heak vun; Pathian mite theampo atu thungen tawntung vun.
(*_*) =*=*=*=*=*= (*_*)
Comments are off this post