LYRIC
15 Thaw Kikna (Easter)
Thuciam Lui
Tu a ih thupuak akua in um thei tu ziam? Hi thu sungah TOPA vaangliatna akua in mu thei tu ziam?
Leingum sungah zung a tha thing kung no khat bangin ama ii na seampa a khanto sia TOPA deina ahi hi. Ama ih et nop natu in a dei huai a ip laak tu lim le meal bangma nei ngawl hi.
Ama sia mihingte in zawngsak a nial hi; ama in natna le ngimna a thuakpa hi.
Ama sia kuama in en beak ngawlin bangma in a heang bua hi.
Ahihang ama in ei ii natna tu teng thuakin, ih ngimna tu teng pua hi. Tua kimlai in ama thuakna sia Pathian ii daan piak hi ci in ih ngaisun hi.
Tuabang hi ngawlin eite khialna hangin ama in liamna thuak a, ih siatna hangin vuakna thuak ahi hi.
Ama daan thuakna hangin eite ih thinnuam a, vuakna a thuakna hangin eite ih ciidam hi.
Eite ih vekpi in a mangthang tuute taw ih kibang a, eima santek ah ih pai hi. Ahihang eite theampo ii thuak tu a kilawm daan thuakna sia ama ii tungah TOPA in suan hi.
Ama sia nasia tak kivawtsia a, ahihang ki niamkhiakna taw thuak hi; kam khat zongh huthe ngawl hi. Ngaw tu a a kipaipui tuuno khat bang le a mul meet tu a kipaipui tuu khat a haam ngawl bangin, ama in kam khat beak pau ngawl hi.
Ahizong a khakbel ciang hong pai in, kei hong hung tu khat vantung ah om cisia ka he hi. Natna in ka vunte a neaktum zawk ngangawn in hi ka pumpi mama taw Pathian ka mu tu hi.
Thuciam Thak
Sabbath zawkciang, Nipi ni khua hong vak ciangin, Mary Magdalene le Mary dangkhat thaan vil tu in pai uh hi.
Thakhat in zin nasia takin liing hi. Topa vantung lalang khat van pan hong tuaksuk a, thaan kong huhna suangtum liikkeak in a tungah to hi.
Vantung lalang in numeite paupui hi. Lau heak vun. Thinglamtee tungah a kithat Jesus sia zong nu ziam ci in kong he hi.
Ama in hi sungah om ngawl hi! Ama hong son sa bangma in ki tho kik sak zo hi. Hi sungah hong pai tavun a, a lupna hong en tavun.
Tu in manlang pai tavun a, a nungzuite munah, ‘Ama sia thina panin ki tho kik sak zo a, tu in ama in note mai Galilee ah pai tu hi; tua munah ama na mu tu uh hi!’ ci hi.
Tua ahikom amate in, thaan sia manlang takin nusia a, lau kawm si lungdamna taw kidim si in, nungzuite kungah thupuak tu in tai uh hi.
Tu in Christ ii thina panin a kithawkik sakna sia amasabelh thawkikna hi a, ama sungah a thite zongh kitho kik sak tu hi ci in hong lakna ahi hi.
Banghangziam cile thina in mihing khat tungtawnin hong pian bangma in, thina panin thawkikna zongh, mihing khat tungtawn in hong piang ahihi.
Adam suan mihing theampo a thi bangma in Christ taw a kipumkhat theampo sia tawntung nuntakna sungah kitho kik sak tu hi.
Jesus in, “Keima in thawkikna le nuntakna ka hi hi. Kei hong um peuma a thi zongin, a nungta tu hi; nungta a, kei hong um peuma a thi ngei batu hi” ci hi.
(*_*) =*=*=*=*=*= (*_*)
Comments are off this post