LYRIC
17 Ngungzui Suana (Discipleship)
Thuciam Lui
Pathian awng, nangma in ka Pathian na hi a, nangma kong thangai hi. Ka nuntakna bup in nang hong dei hi, tui nga ngawl, munko, leitangh tulsate in tui a du bangin ka nuntakna in nang hong thangai hi.
Na minthanna le na vaangliatna Biakinn sungah nang hong mu sak tan. Tatsat ngawl nong itna sia nun takna sangin phazaw hi, tua ahikom ka nuntak lai teng nang kong pok tu hi.
Thinnuam in ka lumsuk a ka mu hi, Aw TOPA awng, nangma in a bitna mun ah nong keam cinten hi.
TOPA, zingsangin ka aw nong za hi; ni sua ciang kong ngetnate na mai ah kong lui a, nong zo tu kong ngak hi.
TOPA awng, Kong sap ciangin hong ngai tan a, hong hu tan! Ka thungetnate sia ngim namtui bangin hong saang tan a, ka khut laptona in nitak sangaw biakpiakna bangin hong saang tan.
TOPA awng, ka kam ah a cing tu khat le ka muk hong kepsak tu khat hong koi sak tan. Siatna vawt nopna thin hong neisak heak in a, mihing seksolte ngitlona pop nopna pan hong keamcing tan.
Ahihang nang kong muang tawntung hi, Vaanglianpipa TOPA awng. Nong dalna kong zong tu hi.
Nang hong bealte theampo lungdam tahen a, lungdamna taw la sa tawntung tahen. Nang hong itte na hung in, nang hu in amate lungdam takpi hi.
Thuciam Thak
Lampi ah a pai laitak in, mihing khat in Jesu tungah, Na paina theampo ah kong zui tu hi, ci hi.
Jesus in zo kik a, Ngiate in kua nei uh a, vacimte in bu a nei uh hi, ahihang Mihing Tapa in a lusial natu mun zongh a nei bua hi, ci hi.
Midang khat munah, Hong zui tan, ci hi. Ahihang tua pa in, Topa awng, ka pa hong vui sak phot tan, ci hi.
Jesus in, Mithite le mithite kivui tahen, nang na hile pai in, Pathian Ngam thuthang sak tan, ci hi.
Midang khat in, Kong zui tu hi Topa awng, ahihang ka innkuanpuite taw kivaithakna vawt phot tong, ci hi.
Mihing khat lotho a kipan sia in, nungsang a lee et kikik le Pathian Ngam atu in, ama sia kimanna om ngawl hi, Jesus in ci hi.
Kei sangin a nu a pa a it zaw sia kei nungzui tu in kiphu ngawl hi;
Kei sangin a tapa ahibale a tanu a it zaw te kei nungzui tu in kiphu ngawl hi;
A kuama po, a thinglamtee kisuanin ka nung hong zui ngawlte, kei nungzui tu in kiphu ngawl hi.
A nuntakna a nga natu a hanciam khat papo sia a nuntakna taan tu hi; ahihang a kuama po kei hangin a nuntakna a taan le, nuntakna tatak nga tu hi.
(*_*) =*=*=*=*=*= (*_*)
Comments are off this post