LYRIC
24 Christian Pumkhatna
Thuciam Lui
Pathian mihingte kituiton takin a tenkhop uh ciang bangza in lamdang a, bangza in nuam ziam!
Aaron lutung a, a kibuak sathau manpha sia a lu pan a khamul ah a puantual mong kithep dong a luangsuk taw kibang hi.
Hermon Mualvum tungah daaitui Zion mualte tungah a kia sia taw kibang hi.
Tawpna a neingawl nuntakna a kici TOPA thupha piakna mun ahi hi. Zan khuateak Biakinn sungah a na seam, ama naseam theampo awng, hong pai tavun a, TOPA pok vun! Ama Biakinn sungah thungetna taw na khutlaam vun a, TOPA pok vun!
TOPA pok vun, ama pha hi; ama min pokna la sa vun, ama dik hi.
TOPA pok vun, no Levi mite awng; ama a biate theampo awng, ama pok vun!
A thaneam khutte le tha zawmin a liing vadil khupte na tha khoh sak vun.
Hat vun a lau heak vun! Pathian sia note hong suatak tu le na ngalte uh daan pia tu in hong pai tu hi, ci in son vun.
Tua munah, Thianthona ii lampi a kici lampi lian khat om tu hi.
Mawneite kuama in tua lampi tawn ngei ngawl tu a; tua lampi ah tatsate bek in tawn tu a, mi mawmawte ngawngawn in lamkhial ngawl tu hi.
Thuciam Thak
Topa naseam ka hihu in, thongtaak keima in, Pathian hong sap laitak hong koisak bang taw na nuntak natu in, kong hanthawn hi.
A tawntungin kiniamkhiak in, cingh in, na thinsau sak tavun. Khat le khat kidualna taw itna kilak tavun.
Na kilemna tungtawn a Thaa hong piak, no hong ngawmtua kipumkhatna sia a kip natu in na vawt theiza in na vawt vun.
Pathian hong sapna sungah lametna khat a om bangma in, pumpi khat om a, Thaa khat om hi.
Topa khat, upna khat, baptize na khat om hi. Mihing theampo ii Pathian le Pa khat bek om a, tua Pathian in mihing theampo ii Topa hi a, ama in mihing theampo tungtawn in naseam a, mihing theampo sungah om hi.
Thin natna, thintomna le thin uukna theampo na vawk in. Ki sonsiatna, kilanna, le thinsung ki etsatna, a tuatuamte theampo vawk in.
Tua hi ngawl zaw in, khat le khat tungah ki thuthiam vun a, thinneam tavun, Christ tungtawn in Pathian ii note mawna hong mai sak bangma in, note zongh khat le khat mawna kimai sak tavun.
Note sia Pathian it a tate na hi uh bangma, ama bang ngamtat natu in, hanciam vun. Christ in note hong it man Pathian dik sak ngimnamtui biakpiakna le sangaw biakpiakna in, a nuntakna hong piak bangma in, itna taw na ngamta vun.
Ih Topa Jesus Christ thuneina taw, ka suapui note theampo tungah kong thuum hi,
Note sungah kikhenna a omngawl a, ki thukim vadiam vun. Ngaisutna khat le tupna khat bek taw na kipawl khawm vun.
(*_*) =*=*=*=*=*= (*_*)
Comments are off this post