LYRIC
27 Pu Le Pate Ni (Suatakna)
Thuciam Lui
Pathian awng, ngei tawng lai ka pu ka pate hunlai in na sep na vawtte ka pu ka pate in hong son zo a, ka bil uh taw ka za zo uh hi.
Nangma mama in Pathian he ngawlte na notkeak a, amate ngam sungah na mite na koina thu, minam dangte daanpia in nangma mite na khanto sakna thu ka za uh hi.
Note le na suan na paalte in TOPA kungah cia kikin, tuni a kong piak ama thupiakte na thin theampo uh taw na zui uh le,
Khatvei lai na pu na pate ii tenna leitangh na luakik tu uh hi. Taciang ama in na pu na pate sangin a nuamsa zaw le tam a phazaw in hong vawt tu hi.
Tuni in kong piak TOPA na Pathian ii thupiakte zui in ama it in, a thu ni in a thukham theampo na zui uh le,
Note na nuamsa tu uh a, minam lian khat na suak tu uh hi. Note ii na lua natu ngamah TOPA na Pathian in thupha hong pia tu hi.
Tuni in kong piak thupiak sia haksa lei ngawl a, zui laak tu zongh hi ngawl hi.
Tabang hi ngawl hi, hi lai ah note taw hong omkhawm hi. Note in na he uh a, zongh, na son thei uh hi. Tua ahiciang zui vun.
TOPA ih Pathian in ama kep tuam thuku pawlkhat om hi;
Ahizong ama in a thukham hong pualaakzo a, taciang eite le ih suan ih paalte in tua thukham a tawntung in a zui tu ih hi hi.
Thuciam Thak
Pathian hong piak tel zanghin innsa thiamte nasep teng ka seam a, a phungkawng ka phaa sak zawkciang midang khat in a tungah sa to hi.
Ahihang mihing sim in, bangbangin inn sa ziam, ci in a kidop kul hi.
Pathian in Jesus bek ahi phungkawng phaa zo a, a dang phungkawng kiphaa thei nawn ngawl tu hi.
Pawlkhatte in kham, ngun, suang manpha le a dangte in thing, lopa ahi bale taangphaw taw a sato le;
Mihing khat sim ii sepna phat le phat ngawl sia Christ Ni in a pholaak ciangin, kimu tu hi. Meikuang in tua nasepnate a zia en tu a, a phatna le a siatna lak thiang tu hi.
Phungkawng tungah a kisa to sia mei kuang in a kaang sak bale, inn sapa in tel nga tu hi. A kaangtum le a nasep teng sumh tu hi; ahihang ama ahile kaangmei sung pan a suakta bangin ngupna nga tu hi.
Note in Pathian biakinn na hi uh a, note sungah Pathian Thaa hong teang nginge ahi sia na he uh hi!
Tua ahikom khat po in Pathian biakinn a susia le, Pathian in ama sia a susia tu hi. Banghangziam cile Pathian biakinn sia thiangtho a, note mama in ama biakinn na hi uh hi.
Tua ahikom suapuite awng, Pathian ii a lian mama hong hesuakna hu in noma le noma Pathian tungah a hingtang biakpiakna in kinei tavun a, ama deina bang naseam tu in na ki aap tavun.
Hi leitung pianzia zil in na om heak vun a, na thin sunguh kikheal thiangna taw Pathian in na sung sang uh panin na puathak sitset sak vun. Tua hile a pha, dik a sak kicing a sak Pathian deinate na he tu uh hi.
(*_*) =*=*=*=*=*= (*_*)
Comments are off this post