LYRIC
28 Ngual Tungah Thumaana (Social Justice)
Thuciam Lui
Na mawna uh bangza in kiitak huai a, mawna khialna bangza vawt nu ziam, ci sia ka he hi. Mihing phate vawtsia in, sumnguk na la uh a, thukhenna zum ah mizawngte thumaan in thu a kikhen tu na khaam uh hi.
A zawngte le a ngim ngate na zothaw uh a, a antangte na suttol uh hi. Tua hu in noma sak sa suanginn pha sungah na teang batu uh a, sapit huan pha sungah na ciin uh sapittui na ne batu uh hi.
Na nuntak thei natu in siatna vawt ngawlin a pha vawt sawm vun. Tua hile Vaanglianbel TOPA Pathian sia kote kungah om hi, na ci uh bangin note taw om takpi tu hi.
Thusia ensan in thumaan dei vun. Thukhenna zum ah thumaan son vun. Hi minamte sung panin nungta a, a taanglaite TOPA in hesuak thei tha tu hi.
TOPA awng, mihing thinneamte ii thungetna na ngai tu hi; amate thin letna na pia tu hi.
Zawthawk thuakte le tangate kaana na za tu hi; a thi thei mihingte ii launa a pian sak nawnngawl natu in amate sang pangin thu na khen tu hi.
Ka ngalte sia nang nong kilaak ciangin nungkin kik a amate lutu in thi uh hi. Nangma in thutang taw thu na khen a, kei sangah nong pang hi.
TOPA awng, ka thin theampo taw nang kong pok tu hi; a lamdang na nasepnate ka son laak tu hi. Nangma hu in lungdamna taw la ka sa tu uh hi. A lianbel Pathian awng, na min pokna la ka sa tu hi.
Thuciam Thak
Jesus sia Nazereth khua ama khanna munah ciakik a, Sabbath ni in synagogue ah a pai ngei bangin pai hi. Ama dingin Lai Thiangtho sim tu in kipan hi.
Taciangin kamsang Isaiah ii laibu a kipiak ciang hong a, hi bang a ki atna mun mu hi.
Topa ii Thaa kei tungah hong om hi, Mizawngte tungah Lungdamna thupha puak tu in kei hong teal hi. A kimante suatak natu, mittawte khua a mu kik natu, nencipthuakte suatak natu thu a tangko tu in,
Topa in amate a ngup natu hun hong theng zo hi, ci in thuthang sak tu in kei hong kisawl hi, ci hi.
Jesus in Lai Thiangtho zial in, a keampa tungah a aap zawkciang ama to hi. Synagogue sungah a to theampo in, ama lamdang et tek uh a,
Hi Lai Thiangtho kammal hong kisim teng na zaak uh bangin, tuni in hi thu teng hong tangtungzo hi, a ci hu in, lamdang sa tek uh hi.
Kammal tak nei taw a pau thiam hu in mihingte thinsung hong suu hi,
Amate in, ” Hi sia pa sia Joseph ii tapa hi kana ngawl ziam? ci uh hi.
Kei a tatak in kong ci ciang, kamsang khat peuma sia, ama khua ah kisaang ngeingawl hi, Jesus in ci lai hi.
Lai Thiangtho ii ci bangma in phu lam luangin, Na ngalpa a ngil a kial le an na vak in, a dang a ko le a dawn tu khat na pia in, banghangziam cile hi bangin na sep hu in, a maizumna mei in ama kaang tu hi.
(*_*) =*=*=*=*=*= (*_*)
Comments are off this post