LYRIC
34 Kingualtamna
Thuciam Lui
A leei lawlot mihing mamaw khat hi tu sangin thumaan a, a zawng khat ih hi tu phazaw hi.
Ki ngualtamna pawlkhat sia kho ngawl hi, ahihang ngualtam kim khatte suapui laipee sangin thu maan zaw hi.
Mihing mamaw khat in na khat a tel le a tel ngawl sia phamaw a sabua hi; ama ii uuk sia in ama bangza in pil khi ziam, ci in lak nuam hi bek hi. Mawna le maizumna tonkhawm hi; na minphatna tan lete a luangin zawnsakna na nga tu hi.
Mihing khat ii kammal in ciimna ii naak hi thei hi, tuipi bangin thuk a, luamtuite bangin thiang thei hi.
Na ngualtamte ahizong na pa ngualtamte ahizong mangil heak in. Ngim na nga le na suapuipa kungah hu ngen heak in; a nai innpaam khat in a khuala nasuapuipa sangin hong hu thei zaw hi.
Ciim in, ka tapa awng, tua hile ka lungdam tu hi; kei hong sit khat po tungah zokik natu ka nei tu hi.
A zawngte tungah na piak ciangin TOPA tungah pukthaak na hi a, TOPA in hong lo kik tu hi.
Nangma le nangma hamphat kipia in a, na sinthei theampo sin in; taciang na sin sa theampo ciamtee in tua hile na khangto tu hi.
Nangma ngaisutna bek taw nuntakna in mawmawtna hi.
A ciimzawte hilna zui vun a, ngam muangin om vun.
Thuciam Thak
Ka Pa thupiak ni a, ama itna sungah ka kip bangma in, kei kong thupiakte na ni uh le kei itna sungah na kip tu uh hi.
Note sungah ka lungdamna a om natu le na lungdamna uh a kicin natu in hi thu kong son hi.
Kong thupiak in hi thu ahi hi: keima ii kong it bangma in, khat le khat na ki it vun.
A lawmte atu a nuntakna a piapa sangin, a lianzaw ki itna a nei kuama omngawl hi.
Taciang, ka thupiakte na seam uh le, ka lawmte na hi uh hi. Silate awng, kong ci nawnbua hi, banghangziam cile silapa in a topa in bangteng vawt ziam, ci in a he bua hi.
Tua sangin lawmte awng kong ci hi, banghangziam cile Pa kung pan ka zaak thu theampo kong son zo hi.
Note in kei nong teal bua uh hi; keima in note sia a kikhomsuan a nga tam mama na nga natu in, kong teal a, nasep kong pia hi.
Tua ahikom Pa in kei min taw, ama tungah na nget uh po, hong pia tu hi. Tua ahikom hi thu in note tungah kong thupiak ahi hi: khat le khat na ki it tavun.
Khat po in a lian tu a uuk le, a dang teng ii naseampa hi tu hi; no sung pan khat in lampui a uuk le, ama sia a dang theampo ii naseampa hi tu hi.
Banghangziam cile Mihing Tapa ngangawn zongh, ngual in ama na a sep sak tu in hong pai bua hi; ngual atu a seam tu le, a nuntakna pia in, mihing tam mama tan tu in, hong pai hi, ci hi.
(*_*) =*=*=*=*=*= (*_*)
Comments are off this post