LYRIC
43 Lungdamna (Gratitude)
Thuciam Lui
TOPA tungah lungdamko vun, banghang ziam cile ama pha hi; ama hong itna in a tawntungin kip hi!
Ama hong ngup sa note theampo in hi kammalte lokik in TOPA pok vun. Ama in na ngalte panin hong suatak hi.
Tuasia ciang a ngim ngana sung pan amate in TOPA biakpui uh a, ama in a cimawkna uh sung pan hun hi. Ama in lampi tang khat tawnin amate lampui a, a ten thei natu khuapi khat ah then hi.
Amate atu na lamdang a septe hang le tatsat ngawl a, a itna hu in amate in TOPA tungah lungdam ko tu uh hi.
Ama in a dangko te dangcim sak a a ngilkialte anlim taw a khamin vaak hi.
Amate atu na lamdang a septe hang le tatsat ngawl a, a itna hu in amate in TOPA tungah lungdam ko tu uh hi.
Taungo kongkhate ama in saattham a, ki uumna thikzawlte sutham hi.
Amate atu na lamdang a septe hang le tatsat ngawl a, a itna hu in amate in TOPA tungah lungdam ko tu uh hi.
Ama tungah sangaw biakpiakna taw amate in lungdam ko tu uh a, lungdam la sakna taw ama sep sa theampo son tu uh hi.
A ciimte in hi thute ngaisun tahen a; TOPA ii tatsat ngawl itna ngaisun tahen.
Thuciam Thak
Khuano khat sungah a tum laitakin mihing phaak sawm taw kisi hi. Amate sia ama kung panin, tawm a khuala na ah dingin,
Jesus awng! Topa awng! ko hong hesuak tan! ci in au uh hi.
Jesus in amate a mu ciang, Pai tavun a, na thiampite in veal sak tavun, ci hi.
Amate sia a pai kakawm in, dam thiang uh hi.
A damthiangna a kiheak ciangin, amate sung pan khat hong heak kik a, nging takin Pathian pok hi. Ama in Jesus peangah bok in, lungdam ko hi. Hisia pa sia Samaria mi ahi hi.
Jesus in, A kidam sak mihing sawm pha hi; a dang teng koisung ah om ziam? Banghangin hi minam dang pa bek in, Pathian tung lungdamko tu in hong heakkik ziam? ci hi.
Taciangin Jesus in ama tungah, Ding in, pai tan; na upna in hong damthiang sak zo hi, ci hi.
Ngen vun, na nga tu uh hi; zong vun, na mu tu uh hi; kingh vun, kongkha hong kihon tu hi.
Banghangziam cile a ngen papo in nga a, a zong khat papo in mu a, a kingh sia kongkha kihon hi.
Na phatngawl uh kawm panin na tate atu na pha piak tu sia na he uh hi. Tua ahile, vantung ah na Pa in a ngente tungah na phate bangza in hong pia zaw kan tu ziam?
(*_*) =*=*=*=*=*= (*_*)
Comments are off this post