LYRIC
(*_*) =*=*=*=*=*= (*_*)
56 Christian Innkuan
Thuciam Lui
Topa thu nii a, a thupiak bangin a nungtate in mi nuamsa ahi uh hi. Na nasepna in na kisapteng a kicingtu hong pia tu hi; nangma in na lungdamtu a, na nuamsa tu hi.
Na zi in na inn sungah sapit ngui ngathiam bang hitu a, na tate in na sabuai kiim ah olive kung moite bang hitu hi.
Israel awng hi thuciamtee vun! Topa, Topa bek eite Pathian ahi hi. Topa na Pathian sia na thin theampo, na nuntakna theampo, le na thahatna theampo taw it vun,Tuni a kongpiak hi thupiakte mangil ngei heak vun.
Tua thupiakte na tate hilvun. Inn ah a hizong, lampi ah ahizong, na tawlngak ciang le na nasepciang ahizong, hilkik tawntung vun. Hong phawksak kik tu in nabaan ah khi in, na talki ah bel vun. Na kongbiang tung le na baang tung ah at vun.
Tua ahiciang tu in, Topa upat vun a, thintak le thumanna taw sepsak vun. Joshua in a thuson zom a, Mesopotamia le Egypt ah na pute ii biak pathiante vawk vun.
Ama ii na nasepsak nuambua uh le tuni in teal vun, akua atu seamnuam nuziam? Ih pute ii Mesopotamia ah abiak pathian te ii na ziammaw, tu laitak na teenna uh ngam Amor te pathiante ii na ziam? Ka inn kuanpuite le kei kahi uhle Topa atu ka sepsak tu uh hi.
Innkuante in ciimna le telna phungkawng tungah kisa ahihi. Heakna omna mun ah inn doituamte in a manpha na hoite taw kizeam hi.
Na lo ante lakphazo a, na nuntaknatu thalaw thei tu in na kimuan mateng inn saheak in a, baangkua phut heak in.
Thuciam Thak
Tate awng, nute pate thu na nittu uh sia Christian vaipuak hi a, hisia in aman naseptu ahihi.”Na nu le na pa zakta in” a ci sia kamciam taw a kizui thupiak masabel ah ihi.”Tuahile na theampo sungah na khangto tu uh a, leitungah na khansau tu hi”, ci hi.
Nute pate awng, na tate thin uuk natu in vawtheak vun. Christian te kitekna le kihilna taw khangtosak zaw vun.
Tasia bangma in no, zite awng na pasalte khatpo Pathian thu umngawl a om le na ngamtatna taw Pathian thu um khat na suasak thei natu in na pasalte thu na nii vun. Na kam uh taw na pautu kulngawl hi.
Banghangziam cile amate in no sia bangza in a thiangtho le a zataak huai in ngamta nuziam ci in hong mu tu uh hi.
Na samvawt zia uh ahizong, khi le hakte ahizong, nikten puansil ahizong, ta bang tungthamnate taw na hoi natu in kizeam heakvun a, tuate tangin Pathian muna ah amannei bel atul theingawl le a dik thinsung khuangaisutna pha na nei tavun.
Abosa hun sungah biakna sangah atakkha, Pathian tungah lam etna a neite in a pasalte thu a nit uh ciangin a mealhoi suak uh hi. Sarah zong ta bangma ahi hi. Abraham’ thu nii a, topa awng ci hi. Nasep pha seam in bangma kiitaakna nei bana uh le no sia Sarah ii tanute nahi uh hi.
Tasia bangma in no pasalte zongh in, na zite uh thaneam zaw ahi hunlam telthiang in nuntakpui tavun. Amate upat vun. Bang hang ziam cile nang taw kibang in Pathian ii nuntakna letsong amate in zongh sangtu uh hi. Na thungetna uh hong nawngkai sak bangma a omngawl natu in hi bangh ngamtatna nei tavun.
(*_*) =*=*=*=*=*= (*_*)
Comments are off this post