LYRIC
55 Cidamna (Healthy)
Thuciam Lui
A naina le a khualana om mihingte theampo tungah thinnopna ka pia hi. Ka mihingte ka damsak tu hi. Ahihang mi ngilote sia a tawlnga ngeingawl a kilok tawntung tuihual ii buan le niin a paipui tuipi taw kibang hi. Mawneite atu in thinmuanna omngawl hi, TOPA in ci hi.
Mihingte in,TOPA kungah heakkik tawng! ama in hong liamsakzo a, ahihang ama in hong damsak kik nanak tu hi, ama in hong baksak zo a, ahihang ama in ih liammate hong tuamsaktu hingawlziam? Nini ni thum sung eite thathak hong pia kiktu a, ama omna ah ih nungta tu hi.
TOPA ih heakna tu hanciam tek tawng. Tuk ngua hong zu a, leitang tui a buak bang ahizong, a hun man a khua a vak bang ahizong, ei kungah ama hong pai tatak tu hi, ci uh hi.
Nguatui ka khaamciang ahizong lo ante nekhawngtu in khaumawte ka pai sak ciang ahizong, ka mite tungah a kilawthei natnate ka tunsakciang ahizong,
Amate in ka tungah thungen a kisikkik in, asia ngamtatnate nungngat in ahile vantung pan a thungetnate ka zatu a, a mawnate maisak in amate ngam sia ngamnuam ka suaksak kik tu hi.
Ka mawna theampo ama in hong maisak a, ka natna theampo hong damsak hi. Ama in a thupiakna taw amate damsak a, thankuul pan in hun hi.
TOPA awng hong damsak le te ka damthiangtu a, hong hun le te ka suakta tatak tu hi; kong pokpa sia nangma bek na hi hi.
Thuciam Thak
Pai tavun a, Vantung ngam hong naizo hi!ci in hil tavun. Cinate na damsak tu uh a, mithite na nungta sakkik tu uh hi, a cizaathuai a phaakte damsak vun a, doaite not vun. Athong in na saan uh bangma manh la ngawlin pia tavun.
Ngim a nga khatpo note sungah na om uh ziam? Thungen tahen. A lung dam khatpo na om uh ziam? Ama in pokna la sa tahen.
A cina khatpo na om uh ziam? Pawlpi upate sam vun a, amate thunget sakin olive thau taw Topa min suangin zuut tahen.
Upna taw thu a kingen le cinate damtu hi. Topa in cidamna piakik tu a, taciang mawna a vawtte ki maisak tu hi.
Tua ahikom na mawna uh sia khat le khat tungah kipualaak vun a, khat le khat thu na kingetsak vun. Tua hile na damtu uh hi. Thuman thutang khat ii thungetna in vaang nei hi.
Mawna sungah thi a, thutang suana sungah nuntak thei natu in Christ ama mama in thinglamtee tungah a pumpi taw ih mawna hong puaksak zo hi. Ama liammate taw note hong damsak zo hi.
Note sia lam am tuute bang na hi uh hi. Ahihangin na thaa uh hong keampa le tuucingpa a zuitu in hong kiciapui kik zo hi.
(*_*) =*=*=*=*=*= (*_*)
Comments are off this post