LYRIC
44 Mi Thiangtho Te Theampo (All Saints)
Thuciam Lui
Pathian awng, kote hong hesuak tan a, thupha hong pia tan; cikna taw kote hong en tan, tua hile leitung bup in na deina he tu a; minam tatuamte in na ngupna he tu hi.
Mihingte in nang hong pok tahen, Pathian awng; mihing theampo in nang hong pok tahen!
Minam tuatuamte sia lungdam in thinnopna taw lasa hen, banghangziam cile thutang taw mihingte tungah thu na khen hi; taciang leitung minam theampo lam na lak hi.
Mihingte in nang hong pok tahen, Pathian awng; mihing theampo in nang hong pok tahen.
Leitangh in lo ante piang sak zo hi; Pathian, eite Pathian in thupha hong piazo hi.
Pathian in eite thupha hong piazo hi; mun theampo ah om mihingte in ama upat tahen.
Israel awng, nang hong bitphua TOPA in, Lau heak in Kong ngum tu hi. Na min taw kong sam zo hi nang sia Keima mi na hi hi.
Tui thukte na kantan ciang, nang taw kong omkhawm tu hi; na thuaknate in hong zo zo ngawl tu hi.
Mei na kantan ciang, na kaang batu hi; vawtsiat, haksatnate in nang hong na sak ngawl tu hi.
Banghangziam cile keima in TOPA na Pathian, Israelte ii a thiangtho Pathian, nangma hong ngumpa ka hi hi. Lauheakin nangma hong ompui khi hi!
Thuciam Thak
Ei ih hi le, ih kiimkot ah hiza a tam mihonpi tetti ih nei hi. Tua ahikom ih mai hong khak thei na theampo le hong lencip thei mawnate vawkin.
Ih mai ah tai natu om a, tai kidemna sungah thin takkhana taw tai tek tawng. A kipatna pan atawp dong upna a piang sak pa, a kicing sakpa Jesus mitsuan tawng.
Pathian Thaa lampuina a zui mihing peuma sia Pathian tate ahi uh hi.
Pathian Thaa in eima thaa taw kikopin, Pathian tate ih hina tetti in hong pang khawm hi. A tate ih hi zawk nungsang a mite atu a khealsia thuphate ih lua tu a, Christ atu a Pathian ii a koinate zongh ih lua tu hi.
Mihonpi tam mama te sia minam, ngam tuatuam le pau namcin pan hi a, amate in Tuuno kumpi tokhum mai ah dingin, puantual kaang silh a, a khut sungah palm sawl toai uh hi.
Upate khat in, Hi puantual kaang silhte akuate hi a, koisung pan hong pai ziam? ci in hong dongh hi.
Topa awng, he ngawl khi hi. Nangma he tu ni hi, ci in ka zo hi. Ama in, Hite sia vawtsiatna nasia mama sung pan a suaktate hi. Amate in a puantualte sil thiang zo a, Tuuno mai ah dingin, a chi taw kaang sak zo uh hi.
Amate in ngilkial, dangko kik ngei nawnngawl tu hi. Ni le satna a nei dangte in amate sia kaang ngawl tu hi. Banghangziam cile kumpi to khum zanglai ah a om Tuuno sia in, amate tuucingpa hi tu a, amate sia nuntakna ciktui ah paipui tu hi. Taciangin Pathian in amate mittang sung pan thitui theampo nawlsak tu hi, hong ci hi.
(*_*) =*=*=*=*=*= (*_*)
Comments are off this post