LYRIC
14 Nuktu Nipi (Palm Sunday)
Thuciam Lui
Jerusalem awng, thahat in a, khangto kik in! Pathian ii a thiangtho khuapi awng, puan et lawm puan hoi silh in!
Mualte kantan in, thuphate, puak a hong pai kamtaipa ih mu tu sia lamdang lalawm hi! Ama in ngal zawna thang sak a Zion tungah, Na Pathian sia kumpi ahi hi! ci hi.
A kisia Jerusalem awng, lungdam in au vun! TOPA in a khuapi suatak tu a, a mite heeneam zo hi.
TOPA in ama ii a thiangtho vaang letna zangh in, a mite ngum tu a, leitung theampo in Pathian ngupna mu tu uh hi.
TOPA in, Ka naseampa in ama ii nasepna zo tu a, ama sia nasia takin kipok tu hi.
TOPA sung ah nasia tak ka lungdam tu a, ka Pathian sung ah ka nuntakna nuam kasa tu hi.
Banghang ziam cile ama in ngupna puan kei hongsilh sak a, thutang suana puantual taw kei hong tuam zo hi.
Banghang ziam cile leitangh in a kitu anciite posak in a meento sak bang ma in Vaanglianpipa TOPA Pathian in a mite ngum tu a, minamte theampo mai ah thutang suana le pokna a thangsak tu hi.
Thuciam Thak
A zing ciangin Paisan Poai siim tu in hong pai mihonpi khat in, Jesus sia Jerusalem khua ah hong pai hi, ci in za uh hi. Tua ahikom amate in palm thingbaak la in, ama muak tu in pai uh a,
Pathian pok vun! Hosana!Topa min taw hong paipa sia, Pathian in thupha pia tahen! Hosana! Pathian in Israel Kumpipa thupha pia tahen! ci in au uh hi.
Jerusalem khua sungah Jesus hong tum ciang, a khuathing bup ngamlum lialua uh hi. Ama sia akua ziam? ci in mipite in dongh uh hi.
Hi pa sia Galilee ngam Nazareth pan kamsangpa Jesus hi, mihonte in ci in zo uh hi.
Biakinn sungah Jesu tumin sumzuak sumlei theampote notkeak hi. Sum theakte ii sabuai le vakhu zuakte ii tokhumte sawnthal sak hi,
Taciang, Lai thiangtho sungah Pathian in, ‘Ka Biakinn sia thu ngetna inn’ kici tu hi, ci hi, ahihang note in ngutate buhna na suak sak uh hi! ci hi.
Jerusalem ah poai sung teng biakpiakna nei tu in, a paite sungah Greek te pawlkhat om hi. Amate in Philip (Galilee ngam Bethsaida khua mi) munah pai in, Syapa awng, ko Jesus taw kimu nuam khu hi, ci uh hi.
Jesus in, Mihing Tapa ii a lian minthanna a saan tu hun hong tung zo hi. A tatakin kong ci hi: zungtaang tang khat lei ah taak a, a thi phot bale ama nguak hi top hi. A thi le antang tam piang sak hi.
(*_*) =*=*=*=*=*= (*_*)
Comments are off this post