LYRIC
39 Thin Muanna (Security)
Thuciam Lui
TOPA ka it hi, banghang ziam cile ama in ka aw hong za a; ama in ka thu ngetnate hong ngai hi.
Ka biapui simin ama in hong ngai hi.
TOPA sia hesuak thei a, pha hi; ih Pathian in khuangai huai hong sa thei hi. TOPA in thina panin kei hong suatak hi; ama in ka thitui hong khaam sak hi, taciangin hong lel sak ngawl hi.
Kei hong huutna lungdamkona in ama tungah sapittui biakpiakna ka pia tu hi.
Na mite theampo kikhopna mun, Jerusalem na Biakinn a thiangthona ah, kong kamciamte kong pia tu hi.
Na thukhamte ka ni tu hi, Kei hong taisan ngei heak in!
Na naseampa na hu tu sia kamciam pia in; a kiphasak te in hong zothaw sak heak in.
Nong hut natu kong etna, nong kamciam sa ngupna ka etna in ka mit taak ngiingeei zo hi.
Thinkiam in inn taw a kikhuala na pan nang kong biakpui hi! A muanhuai belna ah hong zotpui tan,
Banghangziam cile nangma in ka kidalna na hi hi, ka ngalte panna a kho ngalnanna na hi hi. Ka nuntak sung tawntung na inn thiangtho sungah hong teang sak tan; na thakhui nuai ah thin muanna hong nga sak tan.
Thuciam Thak
Vanngit pua in, a toite theampo awng, kei kungah hong pai tavun, tawlngakna kong pia tu hi.
Ka hakkol la in kisuan vun, kei tung pan hong kisin tavun, bang hang ziam cile kei sia cingh in a ki niam khiak pa ka hi hi; tua ahikom toithaina na nga tu uh hi. Bang hang ziam cile, hakkol kong sottu sia puaknop a, vanh kong sottu sia zaang hi, ci hi.
Tu in Christ taw pum khat in a nungtate atu in kipuavawkna a om bua hi.
Banghangziam cile Jesus Christ taw kop a nuntakna sungah hong then thaa ngeina in mawna le thina ngeinate panin hong suakta sak hi.
Chi le sa sawl bangin a nungtate chi le sa deina in uk a, Thaa ii sawl bangin a nungta te Thaa ii deina in uk hi.
Na thinsung uh chi le sa deina in na uk sak uh le thina piang a; na thinsung Thaa in a uk le, nuntakna le thin nopna piang hi.
A kuama po Christ ii Thaa a nei ngawl sia in, ama neisa ahi bua hi.
Ahihang Christ note sungah hong teang le Thaa sia no atu in nuntakna ahi hi, bang hangziam cile na pumpi uh sia mawna hangin thi tu ahita zong note Pathian taw hong ki lemzawng sak hi.
Banghangziam ci le chi le sa deina bangin na nungta uh le na thi takpi tu uh hi; ahihang mawna ngamtat nate Thaa taw na thatlum uh le na nungta tu uh hi.
Thaa in Pathian tate hong suak sak a, Thaa vaangletna taw eite in Pathian tungah “Aba, Pa awng!” ih ci thei hi. Pa Pathian Thaa in eima thaa taw kikopin, Pathian tate ih hina tetti in hong pang khawm hi.
(*_*) =*=*=*=*=*= (*_*)
Comments are off this post