LYRIC
6 Thungetna (Prayer)
Thuciam Lui
Pathian awng, a tatsat ngawl na itna hu in kei hong hesuak tan a, a lian na hesuakna hu in ka mawnate hong mel sak tan!
Ka khialna theampo hong silsak tan a, ka mawna panin hong thiangtho sak tan!
TOPA awng, nong dalna nga tu in nang kong zuan hi; lelna hong thuak sak ngei heak in!
Nangma in thutang na hikom hong tan in, hong suatak tan. Kong ngetna hong ngai in a, hong hun tan!
Kei atu in a muanhuai bukna mun le kei hong dal akho kulhpi hong hi tan; nangma in ka belna le ka kihukna na hi hi.
Mihing tatsiate le, mi ngilote khutsung pan kei hong suatak tan. Vaanglianpipa TOPA awng, ka lametna nang sung kong koi hi. Ama a ko mizawngte theampo le a cimaw a kingaingonte theampo sia ama in suakta sak hi.
Ama in mizawngte le a thazawmte mulkim hi; a kitaangsamte nuntakna a huuk sak hi.
Ama in ki zawthawkna le ngoltolna panin suatak hi; amate nuntakna sia ama atu in mannei a paamai sa hi.
Israelte Pathian, TOPA pok vun! Ama bekma in hi na lamdangte seam hi.
A tuanngen ama min sia a tawntung in pok vun! Ama minthanna in leitung bup ah kidim tahen. Amen! Amen!
Thuciam Thak
Thu na nget uh ciang, inndoi sungah tumin, inn na kha zawk uh ciang, a kimu thei ngawl na Pa tungah thungen tavun. Tua hile a kilangh ngawl na ngamtatna uh hong mu na Pa in tel hong pia tu hi.
Thu na nget uh ciangin, Pathian nei ngawlte bangin, khiakna nei ngawl kammalte zangh heak vun, amate in thunget sau thathei a zak uh ciang, Pathian in zanuam tuan tu in, um uh hi.
Amate taw kibang in, na hi heak vun. Na nget uh ma in Pathian in, na kitaangsap theampo hong he siat zo hi. Tua ahiciang hi bangin thu na ngen vun:
Vantung a om kote Pa awng: Na min thiangtho ki upat tahen; na Kumpi ngam hong piang tahen; Vantung ah na deina a kicin bangin Leitung ah kicing tahen. Tuni ka khamkhop tu an hong pia ta in. Ko tungah hong khialte ka mai sak uh bangma, kote khialna zongh hong mai sak in. Zeetna haksa hong thuak sak heak in a, Ngilopa khut sung pan hong tan ta in. Uk zawkna, vangletna le min thanna Nang aa hi tawntung tahen! Amen!
Note tung a hong khialte na mai sak uh le, vantung a om na Pa zongh in, note khialna hong mai sak tu hi.
Ahihang ngual khialna na mai sak bua uh le na Pa zongh in note khialna hong mai sak ngawl tu hi.
(*_*) =*=*=*=*=*= (*_*)
Comments are off this post