LYRIC
47 Tual Sung Nasepna
Thuciam Lui
Uzziah Kumpipa thi kum in, TOPA ka mu hi. Ama sia saang a, a kisaang khai in kumpi tokhum tungah to a, a kumpi puan sia Biakinn buppi dim hi.
A kiimkot ah meikuang bang ahi Seraphim vantung mite ding a; amate khat sim in tha luk tek nei hi. Tha nii taw a mai tek sealin, tha nii taw a pumpi tek sealin, a dang tha nii tek taw leang uh hi.
Amate in: Thiangtho, thiangtho, thiangtho! Vaanglianbelpa TOPA sia thiangtho hi! Ama minthanna in leitung dimh hi, ci in au uh hi.
Keima in, Kei atu bangma lam et omngawl hi! Kei a lal hi zo ing, banghangziam cile ka muk pan a pusuak kammal theampo sia khial na veu hi a, a kampau theampo khialna veu ahi mite sungah ka teang hi. Tuabang teng ahitazong, Kumpipa, Vaanglianbelpa TOPA sia ka mittang vateak taw ma in ka mu zo hi, ka ci hi.
Tasia ciang Seraphim vantung lalangte khat biaktau pan taitee taw meikam khat dep a toai in ka kungah hong leang suk hi.
Ama in meikam taw ka muk hong bit sak a, Hi in na muk hong thu zo hi, tu in na mawna bo siatzo a, na khialna teng kimai sakzo hi, hong ci hi.
Taciang TOPA in, Akua sawl tu khi ziam? Akua in eite kamtai hi tu ziam?
Keima pai tu khi hi! Hong sawl tan! ci in ka zo kik hi. Ka thungetna hong ngai tan a hong hun tan! Na thukham tungtaang ah la ka sa tu hi, na thupiaknate tang hi.
Thuciam Thak
Thukham hilh syapa in, ama le ama kitang sak nuam ahikom, Jesus tung ah ka innpaam pa sia akua ziam, ci’n dongh thua hi.
Jesus in zo kik a, Khatvei lai in pasal khat sia, Jerusalem pan in Jericho khua ah a paisuk laitak in, ngual suam phalakte in suam a, a pum tung a om teng sut in, saat zazan a, a thi dektak sa in nusia uh hi.
Thiampi khat sia tua lampi tawnsuk luilam ahihang, tua a liampa a mu ciangin, lampi langkhat pan in pial in, paisan hi.
Tabangma in, Levi mi khat hong pai a, mihing liampa a mu ciangin, lamdang khat tawnin paisan hi.
Ahihang khualhaw Samaria pa khat hong pai a, mihing liampa a mu ciangin,
A thin sungah khuangai huai sakna taw kidim hi. Ama kungah zuan a, a liammate sathau le sapittui noi sak in, tuam sak hi.
Tuazawk ciangin, a liampa sia, a laa tungah suanto a, zintun inn khat ah paipui in ou hi.
Azing ciangin, ama in ngun dangka pheak nii la in, zin innneipa pia hi. Ama na ou sak in. Kong pai kik ciangin, ama tungah na bona dang theampote zongh kong pia tu hi, ci hi.
Taciang Jesus in thukhupna in, nang ii ngaisutna ah, tua mihing thumte sung pan akua bel in, mihing suamte ii sukcippa tungah innpaamte ngamtat tu bangin, ngamta na sa ziam? ci hi.
Thukham hil syapa in, Ama tungah a thuthiam sia hi, ci in zo kik hi. Jesus in, Tua ahile paitan a, tabang in seam tan, ci in zo kik hi.
(*_*) =*=*=*=*=*= (*_*)
Comments are off this post