LYRIC
5 Unau Khat Bee Khat
(Brotherhood Race Relations)
Thuciam Lui
TOPA tungah la thak khat sa vun! Leitung theampo awng, ama pok vun! Ama ii eite hong ngupna lungdamna thupha nisimin thang sak vun.
Ama minthanna minamte tungah thangsak vun, ama ii a vaanglian nasep nate mihing theampo tungah thangsak vun. TOPA in lian a nasia tatakin pok tu ahi hi.
TOPA pok vun, leitung mihing theampo awng. A vaangletna le a thahatna pok vun.
A minthang TOPA pok vun; biakpiakna khat kengin, a Biakinn ah pai vun.
Lei le van awng, lungdam vun! Tuipi awng,na sungah om nganhing teng taw au vun; lote awng na sungah a om teng taw lungdam vun!
Dui sungah om thingkungte in, leitung uk tu in TOPA hong pai ciang, lungdam in au tu uh hi. Ama in leitung mite sia thumaanna le thutang taw uk tu hi.
Mihing theampo in Pathian nang, hong pok tahen! Minam tatuamte lungdam in thinnopna taw lasa hen.
Mihingte in nang hong pok tahen, TOPA awng; nang hong pok tahen.
Leitangh in lo ante piang sak zo hi; Pathian, eite Pathian in thupha hong piazo hi.
Pathian in eite thupha hong piazo hi; mun theampo ah om mihingte in ama upat tahen.
Thuciam Thak
Athen mite awng, biakna lamsang kin mamate na hi hunlam ka mu hi. Na khuapi sung kantan in, na biakna munte ka et ciangin, ‘A kihe ngawl Pathian atu,’ ci in biaktau khat ka mu hi.
Na heak ngawl bul na biak uh Pathian sia, tu in a thu kong thansak tu sia ahi hi.
Leitung le a sung a om theampo a vawt, Pathian sia van le lei ii Topa hi a, mihingte khut taw a kivawt biakinnte sungah a teang bua hi.
Mihingte ii vawt thei khat beak zongh, ama atu in, a kitaangsamh bua hi. Mihing theampo atu nuntakna le husannate theampo ama ii hong piaksa hi zaw hi.
Ama in mihing khat pan, minam theampo bitphua a, Ama in amate teen natu a hunte le a munte seesiat khol sa in koi hi.
Mihing khat in, Ama sungah ih teang a, ngamta in ih nungta hi. Noma ii la phua pawlkhat bangma, ‘Ei zongh ama tate ih hi hi’ ci hi.
Christ Jesus sung ah Jew te le Gentile te, sila le to, pate le numeite kilaklaw ah kilamdanna om nawn ngawl hi; Jesus Christ sung ah note in pumkhat bek na hi uh hi.
Khat po in Pathian ka it hi ci napi in a suapuipa a ensan le ama in leeilot thusonpa ahi hi.
Banghangziam cile a mu thei a suapuipa a it bale a mu thei ngawl Pathian a it thei batu hi.
Pathian a it peuma in a suapuipa zongh a it tu hi: ci sia, Christ ii eite hong thupiakna hi.
(*_*) =*=*=*=*=*= (*_*)
Comments are off this post